Ninkii soo joog laga waayo, Soo jiifaa laga helaa

Eastleigh Estate- Nairobi

Najah Mohamed Ali

Xaafada Islii ee ka tirsan degmada Kamukunji ee magaalda Nairobi, waa xaafada ay degan yihiin dad fara badan oo Soomaaliyeed Ganacsi xoogan ay ku leeyihiin.

Xaga amaanka Islii waxey soo martay marxalado kala duwan.

1991-dii iyo sanadihii xigay, xaafada Islii dhinaca xigo isgoyska koowaad ama section one, waxaa ka jiray tuugo xoogan, waxaana dadka dhici jiray rag madoow kenyan ah, ayadoona goobahaas loo yaqaanay Shurri-yako ama maxaa iga galay. madaama ay aad ugu badnayeen dhicitaanka dadka balse markii danbe waxaa cirib tiray tuugadaas ciidamada Police-ka kenya iyo dad tiro badan oo dagay xaafadahaas.

Wixii ka horay sanadii 2010-kii sidoo kale waxaa ka jiray Islii tuugo gacmaha ku xirto Alwaax kadibna dadka ku ceejiyo, kuwaaso inta badan dadka ugu dhuuman jiray meelaha mugdiga ah ee socodka dadka uu ku yar yahay.    

Mararka qaar waxaa ka dhici jiray Islii tuugo hubeysan oo intey meelo bar tilmaamadeystaan markaas kadibna duulaan ku soo qaado.

Balse Sanadihii la soo dhaafay xaaladu sidaas wey ka duwaneyd oo Islii waxaa ka jiray Dhalinyaro tuugo ah oo ku hubeysan tooreyo iyo baangado, una badan Soomaali inkastoo mararka qaar ay jiri karaan kuwa kale oo madoow Kenyan ah.

Xaalada ay sababeen dhalinyaradaas oo ah mid amaanka lidi ku ah, ayaa hada waxaa laga dareemay dhamaan wadanka Kenya kadib markii ay dileen dad fara badan oo aanan waxba galabsanin balse ay ka qaadanayeen Taleefoona ay wateen.

Waxey sidoo kale arrintaas ay saameysay Saldhiga Police-ka PANGANI ee  laga maamo xaafada Islii oo horay ay u joogeen Askar ku dhow 100, balse hada lagu soo reebay 10 Askari oo kaliya, intii kalana lagu sameyay transfer ama badalid.


Inkastoo badalkoodi a keeni doono askar cusub, hadana sababta keentay in hal mar la badalo tiradaas ciidanka ah, ayaa la sheegay iney tahay wax ka qabasho la'aanta xaalada amaan daro ee xaafada iyo iney shaqadoodii gudan waayeen.

30-kii bishaan, xilli dad badan ay ku jireen Masaajidka Abuu-Bakaru Sidiiq ee ku yaallo wadada lixaad ee xaafada Islii, markii laga baxay Salaada Cishaha, ayaa Shiiq Maxamed Cabdi Umal, Iimaamka Masaajidkaas, wuxuu la hadlay dadkii ku tukanaayay Masaajidkaas, asagoona kala  hadlay arrimo amaanka xaafada Islii quseyo.

Shiiq Umal, ayaa sheegay in dhibaatada hada Islii ka jirto ay qeyb ka yihiin dhalinyaro Soomaaliyeed, asagoona tusaale u soo qaatay falal dad wax lagu yeelay oo Islii ka dhacay, ayna sameeyeen dhalinyaro da'doodu ay ka yar tahay 15 sano jir, balse Shiiqu wuxuu tilmaamay caruurtaas dhibka geysatay iney u adeegayaan dhalinyaro da'ahaan ka weyn iyaga.

Wuxuu ugu baaqay waalidiinta caruurtooda ay ka mid yihiin dhalinyaradaas,  iney qabtaan intey goori goor tahay, wuxuu sidoo kale walaac ka muujiyay sii socoshada falalkaan amaanka lidiga ku ah.

Dhanka kale, howl-gal ciidamada Police-ku ay dhawanahaan ka sameyeen Xaafada Islii, ayaa waxaa lagu qabtay dhalinyaro Soomaaliyeed oo tiradoodu ay gaareysay 51 qof,  kuna eeysanaa ficilo amaan dari ah, ayaa maalin ka hor la geeyay Maxkamada Sharciga ee Milimani oo ku taallo Wadada Upper Hill ee magaalada Nairobi.

Eedeysanayaashaa,ayaa la xukumayay, waxaana sidoo kale lagu xukumayay hadii ay rabaan iney banaan joog noqdaan inta dacwadoodu ay socoto, iney bixiyaan lacaago feyn ah oo gaaraayo 2 Milyan oo Shilling-ka Kenya  ah oo ay dhigi doonaan eedeysanayaasha da'doodu ay weyn tahay iyo Hal Milyan iyo Bar oo lagu xukumay kuwa da'da yar.

Islii dhawaanahaan waxey u muuqatay iney tahay mid amaankeeda aad loo adkeynaayay. ayadoona ciidamo fara badan ay xaafada dhex wareegayeen. Sidoo kale 48-dii saac ee la soo dhaafay waxaa ka dhacay xaafada gudaheeda falal lagu wax yeeleyay dad shacab ah oo hantidooda laga qaadanaayay.

Xaalada amaan darida ah ee ka jirto xaafada Islii oo looga fadhiyay dadka Soomaaliyeed ee dagan xaafadaas iney xalkeeda keenaan, ayaa hada u muuqato mid dowlada gacanta u gashay, ayadoona dadka qaar ay qabaan in xalka kaliya ee dowladu ay keeni karto uu yahay mid ku imaan karo Xarig ama Xabad, maadaama ay dowladu ayadu masuul  ka tahay sugida amaanka dhamaan shacabka ku dhaqan Wadanka.

Najah Mohamed Ali
Nairobi-Kenya



Comments

Post a Comment